بايرام اولوب قيزيل پالچيق ازه للر
ناقيش ووروب اوتاقلاري بزه للر
تاخچالارا دوزمه لري دوزه للر
قيزـ گلينين فيندق جاسي ـ حناسي
هوسله نر آناسي، قايناناسي
«حيدربابا، بند ۳۰»
باكي چينين سؤزي، سؤوي كاغيذي
اينكلرين بولاماسي ،آغيزي
چرشنبه نين گردكاني مويزي
قيزلار دئير «آتيل ـ ماتيل چرشنبه
آينا تكين بختيم آچيل چرشنبه
«حيدربابا، بند ۳۱»
بايراميدي گئجه قوشي اوخوردي
آداخلي قيز بيگ جورابين توخوردي
هركس شالين بير باجادان سوخوري
آي نه گؤزل قايدادي شال ساللاماق
بيگ شالينا بايرامليغين باغلاماق
«حيدر بابا، بند ۲۷»۲
شال ايسته ديم منده ائوده آغلاديم
بيرشال آليب تئز بئليمه باغلاديم
غلام گيله قاشديم شالي ساللاديم
فاطما خالا منه جوراب باغلادي
خان ننه مي يادا ساليب آغلادي
« حيدربابا، بند ۲۸ »
يومورتاني گؤيچك گوللي بويارديق
چاققيشديريب سينانلارين سويارديق
اويناماقدان بيرجه مگر دويارديق
علي منه ياشيل آشيق و ئرردي
ايرضا منه نوروزگولي درردي
«حيدربابا،بند ۳۲»